Ui chanchin

Kan ui hmasa ber Emi kha eng rawng nge a nih ka hre miahlo a nih chu. A uk niin ka hria a, a dum niin ka hre bawk a, ka chiang lo. Tunge a hming kha phuah a, khawi atanga kan neih nge lah hre hek suh; kan kawl rei lo em a ni tih hi ka insawifiahna ah min lo pawmsak mai teh un. Balu a hai lai chiah hi ka mitthla ah zuk awm a. Ka nu bazar a zui a, a bo daih a, miin an ru a nih kan ring ringawt.

A pahnihna atan Nancy kha kan nei leh a, khawia mi nge kan neih ka la hre chuang lo! Ani kha chu a buang a ni a, a hmul pawh a sei lutuk lo mahse kawng mut em chu a ni lo a, a lei hi a vei seh tet zel . Mi um hi a peih em em a, inchhungah hian kan inum kual vak vak a, thutthleng leh dawhkanah hian kan lawn chhuk chho zut mai a ni. Thutthleng te kha a lo bal duh awm e ka ti, ka nu khan min hau ngai lem hlei lo a. Nancy kan neih lai kha 1989 ni ta in ka hria. A dam rei lo, ui ke natna an tih ang mai kha a vei a, a ke hnung lam hi a zeng tlat a, kal pawh kal hleithei lo khan a awm a. A thihdawn lamah phei kha chuan a mu tawp a, eitur leh intur kan pek pawh hi a ei peih tha mang lo a ni. A thihni chuan ka nu hovin kan tap tliar tliar a, inhnuaiah kan phum a. Kan la naupang bawk a, a thlan te khan pangpar in kan chei a, kan theihnghilh leh thuai a.

Niggy erawh hi chu kan ui neih rei ber leh ngainat ber, a chanchin kan sawi ban theihloh a ni thung. Republic Venga ka ni te ui note kan lak a ni a, 20 March 1991 khan a piang a, kan lak ni kha May 15 a ni ta in hria. Ka nau mipa hian zingkarah a va la a, a rawn pawm haw a. Dum tereuhte, cher deuh, nghawng rek ngit nget deuh mai hi a nia, a va han chhe reuh tak em! A hmul tawi chi kha a ni bawk sia, duhawmna reng hi a nei lo. Mahse ui kan awhna kha a rei tawh em avang khan kan duat em em a. Mami hian a hming hi a lo phuah a, Niggy tih hi. Khatih hun lai khan cowboy Sudden-a thawnthu chhiar kan hrat lai kha a ni a, Sudden-a sakawr dum kha Nigger tih a ni a, khami zulzui khan "A nu a ni sia, Niggy ni rawh se" a ti a, a pu hlen ta a ni.

Mi in ui chanchin an sawi tawh hi chuan Niggy hi rilru ah a lo lang lo theilo, a chanchin engemaw tal lo sawi ve hi a nuam a. Zualtea (Read his blog! He's a single eligible bachelor!) nen Facebook ah ui chanchin kan sawi a, blog tur hian min inspire a nih ber chu.


Han sawi tan tur ber pawh ka hre lo. Khatla a Vety hospital ah kan va chiu tir te pawh ka la hrechiang khawp mai. Mi hian chhia hi an ti thei em em a, a dum sia, a hmui hi a sawi a, a tlan pah hian a ke hnunglam veilam hi a khawngkhawbai leh euh thin a. Naupang ninhleiin an lo vawm a nih ka ring ta. "In uite chu a va han chhe em em" te hi an ti leh ngawih ngawih thin. Mahse a chhia a chhia khan a lar em em tho; a chhe lar te pawh a tih theih ang chu. A hming lah hi duh dan dan hian kan ko a, Ni-i te kan ti, Lal-ni kan ti, ka pa phei chuan Meg-te a tia, a tlan ve dar dar zel tho. Hmanni ah ka thiannu kum 15 lai mai ka hmuh tawhloh nen Facebook ah kan inbia a, Niggy hi a lo la hria a nih chu, a Mizo hming thlengin! Ka va han nui nasa tehreng em!

Niggy chu a naupan deuh lai khan vawikhat chu vun natna hi a vei a ni. Ka nu nen Kulikawnah entir turin kan hruai a, Thakthing atang hian bus in kan chuang thla a, phur deuh hian Niggy chuan min zui a. Enge kan tih dawn kha hre hek lo Kulikawn kawngphei ah te chuan phur vei ras, kal vei hawrh hawrh a. Clinic ah pawh khan engmah a la hrethiam lo. An han chiu ta a le, na hi a ti khawp mai a. A hnuah check up tura kal leh dawn chuan a kal duh tawh lo a, ka pawm nge ka kai nge ka hre tawh lo, engtin tin emaw chuan kan thlenpui hram a. Chuan clinic a kal kha a ngai tawh lo a, mahse a vun na laiah chuan damdawi hnawih hi a ngai thung a. A daktawr/clinic neitupa khan "In in hi ka rawn kalpel ziah tho a, kal pahin ka rawn hnawihsak mai thin ang" a tia, a remchang kan ti khawp mai a. Ni hnih vel kha chu a rawn hnawih ve in ka hria, a damdawi bur sen ngei mai kha. Mahse Niggy khan khapa kha haw em em a, a lo tlanchhiat loh leh a lo bauh vak vak a, damdawi pawh kha an inhnawih hleithei ta lo a. Keimahni in kan hnawihsak chhunzawm ta a, chupawh harsa tak a ni. A damdawi bur kha a hmuh tawh chuan a tlanchhe nghal a, spy tawk in engtin tin emaw hnawih kha a ngai thin a. Mahse a ngeih khawp mai a, a vun na pawh chu a dam tha khawp mai.

Inbual mawlh kha a va'n hreh thei tak em, sawi thei se chu thih hrehin ka hreh a ti hial ang. Bual dawn chuan a bulah hian inbual tih tawngkam hi kan sawi ri ngam lo hrim hrim a, inbual dawn awm anga a inhriat chuan a leng daih a, han au ila a tlan hla sauh a. Thenawmte in bul atang hian a rawn bih dawk dawk anga, "Min bual tum tu te hi an la awm em" tih ni awm tak hian. A chang chuan nileng deuhthaw te hi zuk tlanbo peih a. Mahse han inbualfai kha chu nuam a ti leh em em thung a, inchungah hian buara emaw pawnchhe fai hi ka phahsak a, a han sapatal vel thin.

Mi zui hi a peih em em bawk a, "Niggy khawvelah enge i hlauh ber?" tih zawhna hi zawt ta ila min chhanna tur chu "Kal ve loh" tih a ni ngei ang, tawng thei se chu. Ka u in a sawi dan takah "Khawlaiah i thiante nen in ding mai mai a, i hnung lam atangin i chawnah eng in emaw rawn bawh thet se la, tunge a nih i hre nghal ang". Ka nu hi bazar tu ber a nih avang leh ina awm ber a nih avang hian a zui nasa leh zual bik a. Ka nu in a bazar bag a han ah tawh chiah hi chuan Niggy hi a thil tih lai bansan hmakin kal ve turin a lo in ready thin a. Khatih hun lai te kha chuan tunlai angin ui te la khuahkhirh ve hek lo, Niggy chu pawnah a lo va tlanchhuak a, ka nu hi veilamah nge a kal dawn dinglamah tih a lo chang thin. Midang pawh hi min zui ve vek tho a, han chhuak dawn ila Lo kal suh, tiin kan han vau ve bawk a, thui kan kal hma a chak lutuk a min rawn tlanpel fua tawh thin kha chu kan nui ve tawp zel. Umphak loh tawk chinah hian a ding anga, a rawn lehhawi hraw anga, kan la kal zel nge zel lo en ni awm tak hian. Mahse vengpawnah chuan mi hi a zui rei peih miah lo a, a lo haw daih zel. Vengchhungah erawh chuan a lar em em a, naupang zawng zawngin an hria a, kan lenna thin deuh te in chu a hre vek bawk a. Kan kal dan atangin kan lenna tur in nia a hriat ah chuan a lo va lut hmasa thawt thawt thin a, "E hemi te chhung tuemaw ber chu a lo lang thuai dawn a nih hi" an lo ti thin.

A thikthu kha a chhe ve hle bawk. Vawikhat chu zawhte hi la ve ang u, kan ti a, kan thenawmte zawhte note hi kan la ve ngei a ni. Niggy hian a haw em em a (awmrei se chuan an inngeih leh tho ang), chu zawhte note chu thlabar reng reng hian a awmtir thin a. Tlaikhat chu zawhte chu ka pawm a, Niggy chuan a lo thik aniang chu a rawn hap titih ta mai, zawhte hlau lutuk chuan ka kutah hian min seh a, a thi duh khawp mai lehnghal a, zan zanah Civil Hospital casualty ah ka va inchiutir leh a. Zawhte note pawh chu ama thu in a lo haw leh daih a, "An ui a sual em mai ka awm peih tawhlo" ti ni awm takin.

1999 khan ka u fapa Hruaia hi a piang a. A tet laiin vawikhat chu a inbual zo hi pawnah hian nilumah ka thutpui a, Niggy pawh chu a lo awm ve a. Kan in hi kawng bul mai a ni a, kan thianpa pakhat Lalnunmawia hi a rawn kal a, Hruaia chu a rawn lawm a, Niggy chuan Lalnunmawia chu seh a lo tum a nih chu. Lalnunmawia chu a kal nghal vang vang.

Ui hi an ngainatawm em em nachhan chu mi hi an rilru zawng zawng hian an ngaina a. Chhuak ila han haw ila an lo lawm em em a, mi hi an lo zuan a, zun cheh khawpin an lawm thei a nia. An mi hriat zawng te chu rei tak pawh hmu lo se an theihnghilh lo va, thla tam tak hnua an rawn len te hian an lo lawm em em zel. Hmundangah kan awmsan a, han haw chang hian Niggy lo lawm lutuk hi a khawngaihthlak zawk thin. Min lo zuan, min liak, min seh lo chauh a ni, thutthlengah han thu ila a rawn thu ve a, mi ngheng thei ang berin, a chang leh a rawn mu a malchungah a lu a rawn dah a. Hetiang tehrenga unconditional love chu misual rilru chhe ber pawhin an ngaina lo thei bik lo vang. Mi ui var sir ser, hmul sei fai siu siau ai kha chuan Niggy, dum chhe tak, hmui sawi, a hnuah phei chuan a hmul la tuak var zui, kebai deuh reuh kha kan duh fe zawk tlat a ni.

A saptawng takin "accomplishments" kha ngah em em lo mahse, Niggy thil thiam em em chu sazu man kha a ni tlat. Mami nen hian an combi hi a fuh tawp a. Sazu thawm an hriat chuan Mami hian hmunphiah a chuh nghal a, Niggy lo phur lutuk hi a lo za vel chung thin mawle. Chuan Mami chuan a va hawlh a, Niggy chuan a lo chang a, sazu rawn tlanchhuak chu a lo man chat zel mawle. A sport nuam tih zawng tak a ni ngei ang. Thlanlung siamsak ila chuan tarlan ngei chi mawle.

A sei thawkhat ta e, duhtawk dawn ila. 15 October 2005 khan Niggy chuan min thihsan a. Kum 14 a ni. Mihring kum 7 leh ui kum 1 hi a intluk e, an ti a, Niggy kha mihring chu nise kum 98, kum 99 dawn a ni tihna a nia. A tarthi a nih deuh ber chu, a taksa kha a chaklo tawh em em a, a beng te a chhet a, a tan chuan thih kha a tha zawk a ni. Kan ngai em em a, tun thleng hian kan la ngai a, a chanchin hi kan sawi bang thei lo.