Sunday, January 23, 2011

Khirh

Pathianin nungdama min la zuah zel te anih chuan engtik hunah emaw chuan kan lo tar ve ngei dawn sia, ka peihlo lawk! Ka peihloh nachhan ber chu thalai te nun ka man loh lutuk dawn vang pawh ni lo, kawm tur an awm dawn loh vang pawh nilo, ka khirh dawn lutuk ber hi! Tu leh fa te kan la nei ve ngai te a nih chuan min ning thei ngawt ang. "Ka pi hi chu phunchiar si, thil awmzia a hrethiam si lo,a ninawm ngawt mai" min la ti ang a, an nu te khan "In pi neihchhun a nih hi, duat rawh u" kha an lo ti bawk anga. Pasal te kan neih loh tak leh unaute bulah kan khawsa ang a, "In ni hi duat rawh u, duattu tur fa te a neih ve loh hi" an ti ang a.

Mahni kan inhriat ai daih leh kan rinai daih hian kan thlahtute hi kan lo chhun thin. Mizia ah te, chezia ah te, ngaihtuahna thleng te pawh a niang chu. Kan seilenna leh kan lehkhazirna, hnathawhna, chenna hmun te hian kawng tam zawkah chuan min influence mahse kan mizia tamtak hi chu kan thisen ah hian a bet hi ka ti ve tlat.

Ka nu te lam hi mi ngaihsam, thil pawh pawm zel thei mai an ni a. Ka pa te lam ve thung hi chu khirh ve angreng, phunchiar ve angreng, taima bawk si an ni a. A khawilam hi nge maw ka chhun le, ka ti thin. Ka ngaih kha chu a sam ve thei khawp mai, hoh pawh kha ho ve thei tak ka ni. Ka thiante leh min hre tute in zawh chuan mi ho ve angreng, thutak pai lemlo, thawveng ve tak ni thin in min sawi ang. Mahse chuti chung chuan khirhna lai te kha ka nei leh thin, ka ngei zawng leh ka ei loh deuh te kha chu polite taka han tuar hram hram mi kha ka ni ngai lo. A chang chuan tawngkam ngeiawm tak tak te pawh ka lo chhak chhuak thin.Thawveng bawk si, khirh bawk si ka ni thin anih ber chu.

Mahse kum te a han liam zel a, khirh lamah hian ka kal ta telh telh maiin ka inhria nih chu! A va han buaithlak em! Nula senior khirh an tih zawng zawng hi ka qualify zo dawn. Nula senior jokes hi kan sawi teh fo a, mahni thu a ar talh ngam ngat chuti khati kan ti a, a hmingin sum tlemte kan lo thawkchhuak ve a, nu leh pa ten min lo duat ve tho sia, ar pawh kha lo talh pawh ni ila enge maw in lo buai le? Mahniin torchlight (cell 3) pawh nei ila enge maw in nuihzat viau le? Tunge thimthamah indap du du peih? Sawi thui lo teh ang.

Tichuan, khirh lam kawng chu ka zawh chho zel chu a nia. Hmanlai anga thawveng taka awm kha chu la chak tho mahila a theih tawh loh. Nu leh pa te sum kha kan ring a, eng lem mah kha kan engto lo a, engpawh kha lo thleng se "A fel leh vek mai ang" kha kan ti liam puat thin a. Mahse tlema lo fin ve deuh tawh hi chuan a theih tawh miahloh. Hna han thawh ve tawh phei hi chuan kan uikawm em em a, kan sum neihzat hi kan hre kar mai a ni. I nuih hma khan han inngaihtuah chiang teh, nangpawh i sum neihzat chu i hre kar a ni lawm ni? Kha daih kha asin.

Khirh in a a ken tel tlat chu strict hi a ni. Strict hle mahila, sual nih chu ka duh lo ve fan tho. Mahse strict nge nge chuan mi kan lo hau zing deuh a, mi kan lo hauh zin deuh chuan min lo ning a, sual nih hi kan lo hlawh leh mai thin. A va buaithlak lehzel em! Thangthar zawk te hi ka rilru ang pu tur chuan ka beisei hauhlo, anmahni ang rual ka niha ka hoh zia leh thawven zia pawh ka hre vek, an rilru tur pawh ka hrethiam vek. Mahse ka lo hau leh thin tho.

Mahse fel thut emaw khirh loh thut emaw chu ka tum chuang lo. Khirh hmasa ber pawh ka ni lo a, khirh hnuhnung ber pawh ka ni dawn chuang lo, tih hi inhnemna nep tak ni mahse tun atan chuan lo inhnem ve der der nan hmang rih teh ang.

17 comments:

  1. Hahaha! Is this truth, lie or in between?

    Hmanlai Aizawl awm laia ka thawhpui te hovin "Kan in khirh siak dawn em ni?" an ti fiamthu thin a. Nang aia khirh an la tam thovang, i khirh ber thei chuang lovang.

    And what a good pic you got here!

    ReplyDelete
  2. hahaha... fel thei ang bera awm tum pawh ni ila, kan rilrem loh zawng kan hmuh hnem thin em avangin leh kan sawi chhuah mai thin avangin naupang deuhte chuan KHIRH an lo ti mai thin zawk alawm..

    ReplyDelete
  3. Mahniin torchlight (cell 3) pawh nei ila enge maw in nuihzat viau le? Tunge thimthamah indap du du peih? Sawi thui lo teh ang.--- Helai hi ka duh lutuk ! :-P

    Tlem te te a, hing deuhva zung tihte pawh an sawi thin kha maw le.

    ReplyDelete
  4. I dawn a sei lua e.. tun hun kha tha deuh khan hmang mai mai teh.

    ReplyDelete
  5. Haha ka duh full... strict tak zelin le :)

    ReplyDelete
  6. mesjay - hehehe it can a truth, lie, or an in-between, depending on what you want to believe. Nia mahni aia khirh tak tak hi an lo awm ve lehzel a, tihzia phian.

    Varte - Chu chu lawm! Ho te a an ngaih te kha ho kan lo ti tawh si lo a, pawilo a an hriat te kha pawi kan lo ti sia, khawvel hi a buai zo thin!

    ReplyDelete
  7. sekibuhchhuak - Torchlight chu sawi loh, Emergency light nen ka thawh chhuah nghal loh! Hing deuhva zung tih te chu tui in tlem vang alawm (insawithiam)

    Alejendro - Nang anga dawn tawi nih ka duh hleinem, tun hun chauh ngaihtuah pawh hi a nilo.

    sawmpui - I pawm zawng tak a ni maw :)

    ReplyDelete
  8. lolzzzz....ka duh lutuk!! pic nen khian inhmeh bawk sia :P

    Anyway, Nu taima tak, bright tak, fel tak i ni tho tho ang.. long live! :)

    ReplyDelete
  9. "In pi neihchhun a nih hi, duat rawh u" - ka tet lai min ti hrechhuak.. Keipawh hi ka unau/family/thiante bulah chuan khirh ka in ti ve, anni pawhin min ti, min hrilh thin bawk.. ka tar hunah chuan I sawi ang khi ka nih duh hmel.
    Thiante hnai vaklo an loh len a, thingpui no/glass etc an dahna tur en miah lova han nghah mai an tum te hian, sawi ngam chiah lovin, an thlauh loh hlauhpui deuh siin ka lo melhpui thin, and when our eyes meet, it makes for a pretty awkward moment. lolz..
    Btw: Friendly advice, keep the text inside quotations ("") in bold, it makes it easier to read the paragraph, in contrast to the text on your blog as it is a bit fine.

    ReplyDelete
  10. Mimi - ka lawm em em ee.. pic khi ka zawng rei asin, google image ah old lady tih kan type chiah chu awi awi mirethei pics te rawn lang chhuai chhuai mawle, office chu ni se min ban chiang viau ang hihihi

    blackestred - upat hian khirh hi a keng tel a nih ber hi maw, duh vang leh tum vang reng pawh a ni lo e ti daih mai ang aw.
    Thanks for the friendly advice, will keep that in mind.

    ReplyDelete
  11. 'Khirhtometer' hi siam tawh se tunge khirh ber hriat a chak awm ngawt ang.
    Mipa chu kan tar tulh tulh a kan khirh lo tulh tulh. Nuam bik.

    ReplyDelete
  12. Aduh, i khirh hi ka ring thlawt lo! i hmel en pawhin i fel tih a hriat reng alawm! mi chuan duh duh lo sawi ve mai mai teh se! An fel loh vang ani mai! Try to build up a positive concept of yourself! You are indeed an idol to many!

    ReplyDelete
  13. Mifingin ka fing an ti lova, mi a in "ka a" an ti hek lo. Khirh i inti a maw? I khirh ka ring ta miah lo mai.

    ReplyDelete
  14. Pi Aduhi chu i va'n khirh chiang em aw.. Nula senior kan lo sawina zawng zawng lak atangin i insawi fihlim hmin hmiah thei nia! I khirh vang vek a ni.

    Last para khi ka duh khawp mai, i inhnêm thiam lutuk tlat! :D

    ReplyDelete
  15. daniel - Mipa pawh hi in khirh ve tho e aw, lo insawibo tum suh.

    Maisek - Looks are deceptive! Hmel en ai hian ka khirh. Fel hmel deuh si a ruka khirh nih hi lawm khirh ah pawh buaithlak leh zual chu, Tihngaihna vak a awmlo, tawrh tawp a ni mai.

    caribou - Khirh ta sa sa, inpuan law law hi a tha maiin ka hria, heti hian intlawhkhalh jeih jeih ila a fuh ber.

    TS - I lo leng lut a, a va lawmawm em! Nula senior an sawi dan dang i la hriat zawng zawngah pawh khan ka lo insawi fihlim thei zel ang.

    ReplyDelete
  16. Kan naupan laia kan thianten an Ni (nula)in a hauh changa "Pi Khirh" an tih thin min hriatchhuahtir chu le!!! 'Marawhchu thu an awih loh vanga hau thin kha a nia.

    Strict hrim hrim vang bakah mood fuh loh (eg. damsam loh, midangte nena intihthiam loh) vangte pawhin thinchhiat a awl a; thinchhia=khirh and vice-versa? :)

    ReplyDelete
  17. Jona - thinchhia = khirh chu an nih ka ring kher lo, zaidam deuh te hi asin khirh duh hlei hlei. Mahse ni e thinchhiat chu ngaihtheihloh ngah vang a ni pakhat a, khirhna pakhat chu ni ve tho si.

    ReplyDelete