Sunday, February 19, 2017

Chawhchawrawi


Nimin chu MUP function ah ka zuk tel ve a, a hlimawm kher mai. Arrangement leh decoration ah an buai miah lo a, keini thil ti ve sound, banner, tui, pangpar, chair, sofa, dawhkan leh a khuhna te buaipui a kan phili kual chiam ang kha an ti ve lo, hall a awmsa dawhkan leh chair an ring mai a, YMA thutthleng sei tlem an dah belh a. Sound lah Kolasib lam atanga rawn kal ten combo an rawn keng a, a fel der. Hmanhmawh lo em em in hun kan hmang a, Chairman in thusawi tur a sawm a, thusawitu in hun a hman hma in mipui atanga lo dingchhuak a rilru a vei zawng rawn sawi ve ta mai te. Tlar hmasa ber, Chairman hma chiahah thu a muthlu char char te. Zaithiam a zai a, a piantirha a chhartu pitarte kum 90 chuang tawh ha bal heu a lo lam derh derh a, ka chhar a nih hi a tia a lo chhuang em em a. Duh duh sawina hun an hawng a, khuallian kha zawhna te min rawn zawt a kan han chhang leh ang lawp lawp a. Chairman in program a ensual a, hunserh hmangtu tur a din vek tawh hnuah kan han zai leh phawt a. 

In pahnih neih chu bungrua hi kan intheihnghilh rem rum mai a ni. Hman deuhah hmanhmawh deuhin Aizawl atangin ka chhuk a ni. Zan a lo ni a, night cream inhnawih ka tum, awm ta lo, cream reng reng ka lo keng thla lo niin. A tuk zingah a thar ka lei ta ngawt a, a pawilo kalna apiangah hman tur ka nei a ni mai ka ti ta a. Vawikhat pawh meeting kan nei dawn a, ka pheikhawk uk kha bun ila a tha ang, ka ti rilru a, ka mitthla in a awmna ka shoe rack bul ka hmu a. Ka han insiam a, ka pheikhawk chu ka hmu zo ta lo, ka han ngaihtuah chian deuh chuan Aizawl ah zawk a awm tih ka hrechhuak a. TV channel te hi ka hriatpawlh rem rum mai a ni.

Office quarter a awm ve kan staff nupui hi clip dahna tur bag te, ah theih min lo thui ka ti a. Office banah ka va lam a, iptepui ang design, mahse tereuhte, sling bag kan ah thin ang tiat vel hian a lo thui a. Ka beisei aiin a tha a. Clip bag atan chuan ka ui leh sia, bazar nan a that dawn hi ka tia. A tuk Inrinni bazarah ka ak ta ngei a. Kalkawngah mipa naupang rual hi kan tawk a, kan inpelh hnu khan an inhnial sap sap a, pakhat hian “BDO in iptepui a ak lo vang” a tih hi kan hre phak a, ka nuih a za angreng khawp mai a.

Kan quarter piahah hian pitar leh putar nupa rek a cheng hi an awm a, an pa chu a beng hi a chhet nasa em em a, biak dawn chuan a beng bula au ngai hi a ni a. Vawiin chu ka hnenah, “Kan naupan laia Chapchar Kut kan hman dan ka ziak anga, min chhut sak ang che aw” a ti a, chhutsak kan intiam a. “Tunlaia Zawlbuk an sak dan hi a diklo reng reng, a satu te hian Zawlbuk dik tak kha an hmu hmanlo a ni ang” a ti a, a nih duh hmel mange ka ti. “Thakthing Zawlbuk kha a la awm em?” tiin min zawt bawk. Tuna Thakthing Zawlbuk chu concrete building lianpui a ni a, hall a nih hma sikul a nih lai pawh hre ve hman ka ni a, ama’rawhchu Thakthing Zawlbuk tak tak chu ka hre ve pha lo ta deuh a ni. 1929 ah ka piang a ti a, kum 88 a nih tawh chu. Zing khawvar hma in a tho ziah a, ke in a kal kual a, mi kaihthawh nan electric ban te a khawng ri a, thlasik eng ang pawh ni se tuivawtin a inbual ziah a. Tuk khat phei chu a tho hma leh lutuk a, a kal kualnaah tlangval ho zan lo la mengin an lo hmu, hruai haw a ngai anih hi an lo tia, mahse hrechiang deuh tu khan a zing walk a nih kha a lo ti a. A la chak em em a, pheikhawk a bun peih lo a, slipper a bun hi chuan a inchei hle a khawiah emaw a kal dawn tihna a nia. Khawlum vanglai kawngpui sa em em ah pawh kelawngin a vei theuh theuh mai a ni.

Nikum khan post pakhat mah ka siam lova, a zahthlak em mai kumin chu tan la deuh teh ang tiin rilru a awm awm ka rawn post a ni e. Blogging kan han uar hluai a, a hman hman in blog kan siam a, kan zuzi leh thup a. Whatsapp leh Facebook in min chiah hneh em em a. Blogging hi uar leh tawh ang u, post inchhiarsak te, in comment sak liam liam te a nawm em kha. He post title pawh hi ka hmang tawh maithei, mahse phuah tur dang vak ka hre rihlo. Tihian ni phawt teh se.

6 comments:

  1. Like button ka zawng vel... Bloggera group-ah a link te post ve la... Chuan..ka chhiar chiang rih chuang lo.haha

    ReplyDelete
  2. Miss Aduh, a ngaihnawm kher mai. Rawn che leh tan tawh rawh, ka lo phur nghal surh mai :)

    ReplyDelete
  3. I have learned a lot from your article and I’m looking forward to apply

    manpower consultancy

    executive search firms

    ReplyDelete
  4. thanks for providing such a great article, this article very helps full for me, a lot of thanks

    What Is LMS Learning Management System

    Best Learning Management System Software

    ReplyDelete