Sunday, March 11, 2012

Mateii

Kum 15 ka nih kum khan kan vengah mi in luahin an rawn awm a, kan in atanga hnai deuhah an awm nghe nghe a. U Puii kha khatih lai khan kum 25 vel anih ka ring a, U Te-a kha kum 22 vel aniang. Ka ngaihtuah let hian an lo naupang ngawt mai, an chhungte'n an inneih an lo remti vaklo pawh kha ka hrethiam ta. U Te-a te inah khan an han awm ve ren rawn a, mahse U Puii khan a pasala pa kha posi a lakkhum vel thin takah kha chuan an rawn indang ta a nia.

U Puii te nen zawk khan kan inchhung a, mahse kan inchhundan a hla angreng. An rawn insawn hma, in an rawn en vel pah khan min rawn tlawh a. Ka hmuh hmasak bera ka "first impression" kha ka la hre reng mai. Sang deuh, ngo deuh, sam buk deuh, mit lian ker kur hi a nia. A aw kha a thâm deuh tuak a, a hmai kha a duk deuh thluah bawk.

An rawn insawn ta a, mi hi an ti chhung em em a, an nitin office kal tur khan kan in hi kaltlang a ngai a, an rawn lut ngei ngei a. Kan thawmhnaw te kha U Puii khan a duh duh hi a rawn ha a, a thawmhnaw pawh a ui chuang lo a. Keini unau tleirawl rual kha chuan kawm nuam kha kan lo ti bawk si, an inah te khan len a nuam kan ti thei khawp mai. Kan mess hi an rawn join lo chauh a ni. Chhun thingpui in hunah te hian U Puii hi lu thur lei luai hian a lo chho anga, butter pack lian deuh nen. Thingpui leh chhangthawp kha chu kan tum turah khan a dah tawp a, butter kha chhah elkhen khan a'n tat ngei a, keini lahin chuti bawk.

An nupa tê khan an awm a, an hlim khawp mai. Mahse hlimna famkim hi a lo awm lo a ni. U Puii khan natna khirh tak mai SLE kha a vei a, a vun te hi duk thlek thluk thin a. Daktawr te kha an râwn reng thin khan ka ring ta, ka ngaihtuah let leh hian, mahse ka ngaihven loh lam tak kha a ni a. Fa nei lo tur erawh kha chuan daktawr te khan an hrilh in ka hria.

Thil thleng tur hi chu a awm a ni teh chêk aniang chu, an rawn insawn atanga kum khat vel ah chuan U Puii chu a rai ta a. Daktawr te thupek pawh ngaipawimawh zo lo vin neih a tum ta a. An nupa khan an lo inhmangaih ve hle a ni, nuih kha tiza thin hle mah se. Ka nu leh pa bulah khan an rawn inhek nasa thin em em a, U Te-a khan zu in kha a ching ve a, mahse sual zawng leh buaina siam zawng kha chuan a awm ngai lo thung. Mize zâwi tak, tawng tlem deuh, a ruih phei chuan nui vel mai mai kha a ni. U Puii nen khan an mizia chu a inlet thawk a ni, "opposites attract" an tih ang hi a ni ber.

Mateii pian kha ka hrechiang khawp mai. Damdawiin atanga an rawn chhuah veleh an inah kan tlan thla nghal a, puan hian an lo tuam hlên a, a hmui hi a sen ver a, hmeltha kan ti lutuk. A piantirh atang khan kan naute hi a ni nghal ringawt. Kan inah hian hun tam zawk an hman avang khan a thawmhnaw tam tak kha a awm reng a. An rawn chho tawp a, kekawr spare pakhat mah keng lo hian, a ngailo tih kha hre hek. A len deuh hnu khan awmpui tlangval Bawiha tih hi an nei a.

Bawiha mawlh kha! Min va han tihlim thin tak. Amah kha tlangval rau rau ah pawh nula fel tak mai a ni a, inchhung enkawl kha a ti vek a. Buhthlei te kha a thiam em em a, kan inah te a rawn thlei thin bawk a. Mahse a buhthlei dan style kha a mak ve a, inchunga in tê ah khan inkalhkhumin a han thlei kher thin a nih chu! Mi hmuh laia thlei kha a zak a ni chêk ang chu, mahse buh a thlei tih kha kan hre vek tho a, ka nu phei chuan nui char char chungin a buhthlei ri te a han ngaithla vel thin. Kan cousin tleirawl Zovi hi chutih lai chuan kan inah khan a awm bawk a, Bawiha chuan a huphurh em em a, Zovi an in lam pana rawn kal a hmuh tawh chuan eitur te hi a lo thukru sawk sawk thin. Kan indaihzai teh mai ania.

Mateii pian hnu khan kan inchhung zual sauh emaw tih tur a ni. U Puii te in bulah hian parawl pakhat hi a awm a, rawngbawl a peihloh thin avang khan U Puii te mess a zawm a. Thla tawp lamah, U Puii te sum dinhmun kha a lo that vakloh chang chuan an vaiin, an parawl tiam chuan kan mess hi an rawn zawm lehchhawng thin a. Chhangchhe thei rep rep tak kan ni, mahse a nuam phian. Tumah khan kan sawisel ngai lo, kan nin thu kan sawi ngai lo bawk. A nihdan tur ve reng emaw kha kan ti tawp. An nupa an inhauh chang hian kan inah hian inhêk tur hian an rawn chho thin a, ka nu leh pa kha judge leh jury an lo ni a, keini tleirawl ho a sirah kan lo nui tiah tiah a. U Te-a a ruih chang phei chuan a nuihzatthlak thei sia, ka nu leh pa pawh kha an nui ve tawp zel. Mahse an han inhau ve bawk a, an thinrim rei ngai lem hlei lo a, lawm deuh chuan an haw ve leh mai thin.

Chutia buai luai luai, hlim deuh si a kan awm lai chuan U Puii chu a zual ta thut mai a. A natna, zia tawha kan ngaih kha a rawn nasa leh thut a. Hmuh theih khawpin a rawn thawk chak a. Mateii kum khat a tlin hnu lawk, March 1997 khan min boralsan ta mai a. A thih zan te chuan Mateii khan engmah a la hrethiam si lo a, mi zaiah khan a lo lam vel a, a va han lainatawm tehreng em! Khami zan khan midang pawm kha a duh miah lo a, ka pa leh ka u khan an pawm zankhua ta a nih kha. A thih khan U Puii kha kum 28 a ni a, a va han uihawm tak em!

Nu ber a awm tak si loh ah chuan U Te-a te pafa chu a pa te in lamah an let leh ta a, aw Mateii kha kan va ngai thei tak em! Kan veng a inhlat si, mahni hna ah theuh kan lo buai si, duh ang pawhin kan hmu tam thei lo a. Mi an rawn tlawh ngai si lo a, a hnuah phei chuan kan ngaih em em Mateii tan chuan hmelhriat loh ah kan lo chang ta hial a.

U Te-a chuan min la rawn tlawh zauh zauh a, mahse U Puii awm tawh loh hnu kha chuan a khawvel kha a tawp vek a ni ber mai. Zu ah hlimna a zawng a, a hmu zo si lo. Kan lakah pawh khan a inthlahrun phah a. Nikum hmasa lawk khan min boralsan nghe nghe a.

U Puii thihna pawh kum 15 a ni ta, Mateii pawh a nula ve dawn tawh ang. Mate, min hre tawh lo mah la kan tan chuan kan naute duat kha i la ni reng asin! U Pui, U Te, in lei taksa chu thi tawh mahse, kan rilru leh thinlung ah erawh in nung reng tawh dawn si.

19 comments:

  1. Chhiar a hahdam par par khawp mai. Mateii chu a va khawngaihthlak em! Tunah engtin tak awm ang maw? A nu leh pate'n an kalsan hma si a, a baihvai ngawt ang. In chhungkua pawh a ngai thei hle dawn a nih chu. I natna sawi khi ka vawi khat hriatna.

    ReplyDelete
  2. Tunah chuan a pa u te bulah a awm a, an fa angin a awm anih chu. A pi leh pu te nen an awmho vek bawk. Min hrechiang vak lo.

    ReplyDelete
  3. Sap tawng a nih ka lo ring leh pek a, mizo tawng alo ni reng sia..mahse a pawi lo a METAL zawk.!!

    In awm ho lai vel chu a va'n nawm hmel dar dar ve..doctor ten fa nei lo tura an tih chuan neih loh ngam a tha asin le, amaherawh chu Nu hmagaiha hi alo thuk em ani.

    ReplyDelete
    Replies
    1. English a ziah kha ka tum zet a, mahse Mizo tawnga ziah kha a rawn lang leh thut a.

      Nia nuam thei dar dar tak a ni. Lung a ti leng khawp mai.

      Delete
  4. A va lungchhiat thlak leh ta si ve.
    A va ngaihnawm em.

    ReplyDelete
    Replies
    1. Nia lungchhiatthlak tak a ni, an khawngaihthlak bawk si.

      Delete
  5. Mi tha chhungkua in ni e, ti tawl mai ang :)

    ReplyDelete
    Replies
    1. That vang bik pawh a ni lo, a hun khan a keng tel ve hrim hrim a ni. I ti lawmawm e.

      Delete
  6. A ngaihnawm dan chu thinlung a hnawh pik...

    ReplyDelete
    Replies
    1. "Don't cry because it's over. Smile because it happened."

      Delete
  7. Ngaihnawm hle mai. Lung lung te pawh a ti chhia e.

    ReplyDelete
  8. Ka sawitur chu mi(sual) ah ka sawi zo tawh. :-)

    ReplyDelete
    Replies
    1. Nia, thil tangkai deuh deuh kha i sawi teuh tak ;)

      Delete
  9. Pathian leh mihring in kar ang a nih chu. :)
    Amah chu hmu mah ila kan hre chiang tawh si lo, ani chuan kan tet lai zawng2 in min awm tlei a, kan chakloh lai zawng2 in min thlamuana, keinin kan hre tawh si lo ang vel hi ni e :D

    ReplyDelete
  10. Pathian leh mihring in kar ang a nih chu. :)
    Amah chu hmu mah ila kan hre chiang tawh si lo, ani chuan kan tet lai zawng2 in min awm tlei a, kan chakloh lai zawng2 in min thlamuana, keinin kan hre tawh si lo ang vel hi ni e :D

    ReplyDelete
  11. He thuziak hian ka rilru a khawih reuh khawp mai. Kan damchhung nite hi a rei lo lulai em mai. Keimahni avanga tuar an awm hian a pawi leh zual em em a ni...

    ReplyDelete