Wednesday, December 8, 2010

Thisen Thisen

Chutia han damlo na em em pawh chu ka ni chuang lova, mahse kar khat vel chhung khawsik deuhreuh, hritlang bawk si hian ka awm reng a, nimin chu ka va inentir a. Doctor chuan min lo check a, viral fever a nih dawn hi a tia, damdawi min chawh kur ngei nguai a, "Malaria te a lo nih tak hlauhin" a tia thisen test tur in min tir a, test chi thum ngawt mai tih a ngai a.

Hmankum deuha ka damloh in ka hrawk hi a vung vak mai a (pharyngitis) a natzia chu na tak hi a ni ringawt, chil lem dawn pawh hian inngaihtuah fe a ngai. Khata tang khan ka khua a sik a ka inentir tawh hi chuan pharyngitis damdawi hi min lo chawh tel ngei ngei. Tuna ka doctor pawh chuan "I aw te a chhang em" a tia, "Tlem chuan chhang deuh a, mahse a zia tawh" ka tia, a hmet a hmet a, a lo vung aniang chu min chawh lehpek.

Tichuan thisen test na roomah chuan ka va thu ve ta ran a. A test tupa chuan test tube tereuhte te pahnih hi a la a, "Ehe lak tam i va tum ve" ka ti rilru a. Thisen test lohna hi a rei tawh lutuk a, enge a procedure pawh ka lo hre tawh lo a ni ber. Kan naupan lai te kha chuan kutzungtang hmawr kha an vit thi ser ser a, thisen kha glass slide ah an nuai pherh a, a ro hnu ah solution eng engah emaw an chiah hnuah microscope ah an en thin kha ania, kan hmu ve kur zel an tih vel lai pawh. Chutiang chu a lo ni awzawng tawh lo mai. Ka thil hriat ve dan kha a lo hlui lutuk tawh tlat, khawvel in min lo changkansan daih tawh.

Ka kiu chungah hian torniquet nghet tawkin a rawn suih phawt a. Eheu hei chu drugs timi inchiu tur te pawh ka va ang ve, tih rilru ah a rawn lang a. Ka kut chu sek taka hum turin min ti leh a, ka han inhum sek leh a. Chutah syringe te lem lo tak hi a rawn la a, a hmawrah chuan test tube pakhat chu a vuah a. A hip a hip chhuah na tur a nih vang pawh aniang a hriau kua chu a lian kher mai. Dawihzep deuh chu ni ila ka hlau khawp ang le.

Vein a duh ang a hmu thei lawk lo a, a hmet kual a hmet kual a. Kei intibengvar ta reng reng chuan ka vein hmuhtheih ho kha ka lo kawhhmuh vel, "A pan lutuk" a ti daih. A doctor loh thlak khawp mai. Mahse a hmu ta poh a, syringe a vih luh lai tak chuan a thip ve deuh. Thisen a hip chhuah khan na deuh vang vang turin ka lo ngai a, mahse engtinmah a awm lo. Test tube a thisen tling khawm chu hmuhnawm ti deuhin ka en reng ringawt. Hawkdak min ti ngawt ang. Test tube chu a chanve vel a khah hnu chuan a dang chuan a rawn thlak a, chu pawh chu a chanve vel thleng a la a. A lak zawh vek hnu, ka ban hrenna pawh a phelh hnu chuan test tube chu ka lek kual ka lek kual, "Hei hi ni maw ka thisen chu" ti hmel ka pu ngei ang.

Thisen hi vawikhatmah ka la pe ve ngai lo. Kan office ah hian kumtin Blood Donation Camp hi a awm ziah a, ka pe ve ang ka ti kumtin a mahse pe ngai lem hlei lo a. Taksa tan pawh hian a tha e, an ti.

Thisuk nei hi an khawngaihthlak, an duh reng vang a ni si lo a. Ka nau mipa hian a nei a. A nei tih pawh kan hre ngai lo, vawikhat kan naupangchhia lutuk tawh lo, a kut hi a zai a, a en vung vung a, a tlu ta rup mai a nih chu. Kan thenawm doctor a lo len lai tak kha a ni hlauh a, a bawihsawm nghal vat a. A rawn harhchhuak ve leh mai a, mahse tun thleng hian kan la sawi bang thei lo.

Ka ziak tui laklawh, ziak zel ang. Naupan lai chanchin rilru ah a rawn lang. Kohhran kan hlim deuh kha chuan naupang pawh kha a hlim ber ber, lam nasa ber ber kha kan lo ni ve thin a. Sikul chawlh lai a nih phei chuan thiante inah hian kan awmkhawm a, khuang vua in kan zaikhawm thin a. Mi lamruih dan te zirin kan lamrui der thul. "Thisen hlu thisen hlu, thing kraws chunga luang khan..." tih te kha kan sa nasa thei khawp mai. Vawikhat chu tuemawni hian "Isu I thu ka ngaihtuahin" tih kha a rawn thlang a, kan khuangpu (khatih lai khan kum sawm vel awrh a ni ang) khan hla a rawn la a "I thu I thu ka ngaihtuahin" a rawn ti chiah chu kan nui zo vek. Tunah chuan KTP ah pawh an tangkaipui ber a ni tawh. Hmanlai an chang zo ta... ti mai teh ang.

17 comments:

  1. I van ziak thiam mai mai em! Lal Isua thisen kan tana luang chanchin i sawi dawn emaw ka lo ti a....

    ReplyDelete
  2. a thupui hi... hehe. keipawh hman deuh a swine flu lar vanglai khan ka damsam lo ka inentir a, thisen min test tir a, ka rin ai khan an la tam a, ka ui ru angreng khawp mai a :D

    ReplyDelete
  3. Maisek - Khatiang lam kha chu mi ril deuh ho ziahah ka dah ta mai.

    nancy - Swine flu tam lai khan ka damlo lo hlauh a, a lawmawm tak tak, damloh hi ka chin tehreng nen. Ui tak chungin i thisen chu i thlir liam ta vel mai mai a ni maw.

    ReplyDelete
  4. Pi Aduhi chu, vein hmuhtheihloh khawpin maw ni a i lo......., fiamthu.

    Thisuk nei chu tarmit dum bun tir daih mai tur.

    Ziak ngaihnawm khawp mai.

    ...khrum

    ReplyDelete
  5. Ava ngaihnawm letling vele....i kalna lamtur hi i hai a ni hial lo maw ka ti mai2 a....

    ReplyDelete
  6. keini pawh naupan laiin kan lam rui der nasa thin, Thisen hlu, thisen hlu hi kan lam hla pawimawh berte zing ami ania..

    hman deuha ka kut ka tihnat pawh khan an thui lai ka en kur a, hawkdak chu min ti ve ngawt ang.

    tiang deuh hian ziak ve zeuh zeuh rawh, ngaihnawm tlat.

    ReplyDelete
  7. khumchikthei chu helamah te i rawn chik a, a lawmawm e. Ka lo chum mah mah ani, vein hmuh a har tlat, weightlifting lamah tanlak deuh a ngai.

    marvinic - Thanks for visiting. Kalna lam ber tur hrelo hian kan hawi kual vel anih ber hi maw.

    Varte - Biakin kawmthlang ah hian kan ti chiam chiam zel.. a lo atthlak mang e, mahse a hunlai kha chuan nuam fu.

    Hmanah Aizawl civil hospital ah ka kut ka thuitir ve tum chuan a thui tu nu khan kuhva te a rui vel, hit lo rem rem tak a ni.

    ReplyDelete
  8. Thisen pek hi a vawikhatnaah chuan a hlauhawm ve duh khawp mai. A hriau a lian si! Thisen zam an han hmu thei lova, lehlam an vih thip hlur hnuah lehlamah an han vit leh a....

    I ti tha, i ziak tha bawk.. :D

    ReplyDelete
  9. Pa pakhat chuan vanram a 'thisen thisen' tia zai reng chu ka peih lo, zu ti ve tlat a.

    ReplyDelete
  10. Hotunu chu thuziak lamah i lo duai lo khawp mai. Kan naupan laiin kan veng ami pasaltha a banah a inkap palh a, thisen chhuak nasat lutuk vang leh tihtawp theih loh vangin a thi tawh. Thisen hi a hlu khawp mai. Kan thisen tlemte avanga midang te'n nunna an hloh loh phah theih hi thisen hlutzia tilangtu a ni. Sual tlengfai turi mifel leh thianghlim thisen a chhuah a ngai a, Lal Isua thisen hmangin kan sualna thaibo a ni ta. "Thisen hlu Thisen hlu, thing kross chunga luang kha..... kan damna a lo ni."

    ReplyDelete
  11. Mnn...Vampire chanchin sawi dawn maw ka tia !! Thu i thiam, i ril a, i thuk tel bawk..Fak tak tak.

    ReplyDelete
  12. Zaia - A na ngawt ang le, hriaua han in vih tak sek chu. Cher tan chuan a zia phian dawn nih chu.

    daniel - hahaha hla ngai reng sak chu ninawm ve duh deuh tur asin. Puan var sina len reng pawh hi a chakawm lem loh, puan sen te, a hring te sin chak chang kha kan nei awm sia :D

    caribou - Aw chu pasaltha chu a va vanduai tehreng em.. damdawi in awm thatloh vang a ni thei angem? Pasaltha tan te chuan bana inkah te chu chawei titui tawk lek awm a ni sia.

    Sena - I ti lawmawm e, ka lo awih tak tak ang e. Vampire tih vel han buaipui tuk tuk rual hi kan ni tawh lo ...

    ReplyDelete
  13. @Aduhi: Ka rawn OT chiam a, zia lo hle. Min zawt let tho sia, ka han sawi fiah ang e. Khi pasaltha khi 'a banah a inkap' ka han tih khi, a ban bul ret, a hnuai lam pang ah a nia. Vein/artery pui a chat an tia. Lawngah pawh a thi a tling luau. Tawn khalh a rem lo a ni awm e. A khawngaihthlak khawp mai.

    Mizotawng hian lo ziak ve zeuh zeuh thin teh, kei ang saptawng thiam lo tan chuan chhiar a nuam bik tlat. Tin, kei pawh hi vein hmuh har an ti thei khawp bawk mai.

    ReplyDelete
  14. caribou - Hetah chuan englai pawhin OT phal a ni e, inthlahrung reng reng suh. Vein pui chat chu a vanduai kher mai. An theihtawp chuan an hmanhmawh ve awm sia. Kan thih hun tur hi tumah hian kan hre lawk lo chu a ni sia le...

    ReplyDelete
  15. Ka tum loh lam daih ah min hruai ka ti...thu iva han ziak thiam em em ve..!

    ReplyDelete
  16. Thil ho te a lang ngaihnawm deuh in i chhuah e. Chuan Thisen pek a tha ilo ti zuai te khi a awm zia khawp mai.

    Thisuk awmzia ka hriat phah bawk.

    I naupan lai chu nuam dawn ve. Keini pawn tive nasa thin lawm.

    ReplyDelete
  17. Bee Ramhluna - I va ti lawmawm ve!

    krista - Naupan lai hun kha a lo nuam ber mai asin, engmah lungkham ngai lo, engmah buaipui tur awm si lo.

    ReplyDelete