Masi Bazar

Naupan laia Krismas kan nghahhlelh em em nachhan chu kawr thar neih kha a ni. December thla a lo thlen chuan Krismas card in thawn leh kawr thar inensak reng reng hian hun kan hmang a. Bawng talh tur en leh chaw pek sek pawh a la awm tak! Kan la naupan zual lai kha chuan tlang thing phurh kha an la ti thin a, naupang ho kha kan kal ve ringawt zel a, kan lo ninawm thei ngawt ang.

Aizawl Masi bazar tih sawi a rilru a lo lang hmasa ber chu bazar tawt hi a ni, kha i mitthla in i hmuh nghal ringawt kha... lu hliiir lu hliiir a ni mai tiraw? A tawt lutuk hi kan duhzawng pawh kan lei hlei thei lo a, mipui hian min nekna lam lamah kan kal vel mai mai a; pheikhawk lei tum kha a chang leh theiden kan lei a, kawrlum lei tum khan ringworm leh thek damdawi kan lei a, secondhand thin tum khan chow artui chhipchhuan te kan han ei leh ang lawp lawp a, chutih laiin kawnghren lei dawn lai laiin SIM card nung sa kan han lei leh ang bawk a. Chutiang vel chu a ni.

Pickpocket te hi an lo tam tawh khawp a ni awm a, fimkhur tur hian Market thuneitute an au dup dup reng a. TV news ah khan kumin chhung ringawt ah cheng nuai riat chuang bo angin an lo report tawh a ni awm e. Kal pah hian bag hi kan veng run mai a, ka bag zipper hi an lo hawng ru palh ang tih hlau reng reng hian kan dap ruk ruk reng bawk a. Chutih lai in a tlangpuiin mi hi kan la rinawm niin ka hria a, dawr neituten an dawrtute phone theihnghilh pe tura um vau vau te ka hmu nawk mai. Millenium Centre ah pawh loudspeaker ah dawra an thil lei an theihnghilh thu an au lauh lauh.

Kum la rei vaklo ah kha chuan thil zuar te au hi a nuihzatthlak thei hle thin. A then an lo zai thul, kal pah hian kan nui vur thin. Zion Street chhuk thla cassette dawr velah te khan hla thar hrang hrang hi an play chuah chuah bawk thin a, tunah chuan chutiang chu hriat tur a awm ta meuh lo. Sumdawng te pawh an au peih tawhlo a, an aw an record a an play tawh mai a ni. Dawr pakhat chuan tlangval pakhat hi mic in an autir lauh lauh a, tlai lam a lo nih kha chuan a thiante nen khan uluk lutuk te khan an zai tawh vel a; nuam chu kan ti tlang e.

Krismas tih leh thil thar neih tih hi a inzawm tlat tawh a. Thla a sik dek dek tawh hi chuan secondhand thin tur te hi a tam nghal em em ringawt mai a, kawngsir hmun tinah a inbang kur lek luk a, veng kil tinah hmuh tur a awm a, mamawh lem loh hi kan lei leh chiam thin. December thla tir lamah bungraw hlui tihral duh sale an han nei a, thil tha lei tur a awmlo duk a. Thil tha duh chuan sumdawng ho bazar lo haw nghah a ngai a, a man a to dawn tih kan hre reng si, han lei mai tur awm thin si lo, a buaithlak thei teh e. Krismas a lo hnai a mamawh hi kan ngah thar ta thut emaw tih tur hian kan bazar vak vak a, a Krismas ni tak chu a rei lovin kan hman dan leh kan inbuatsaih dan chu a inmil leh em em lawi si lo. Kan inlei vak vak a, in kan chei a, khawlai kan chei a, a hnu lawkah "Krismas hi a ho tawh e" tiin kan phun kan phun leh a. A ti ho tu chu keimahni lek hi kan ni si a. Kan hman dan hi kumtin a ngai a, kumtin a ho kan ti a, hman dan thlak chu kan tum der si lo.

A ho tih sawi takah chuan, mi tupawhin kan sawi vek chu kan naupan laia Krismas nawm theih bik zia kha a nia, mahse khatih laia upa deuh te khan nuam kan tih em em kha ho an lo ti viau maithei a. Tuna ho kan tih em em te hi naupang te chuan nuam an lo ti viau maithei bawk a. Chutiang mai mai chu a ni khawvel chu.