Aizawl haw

Kum khatah vawikhat ka tlawh a, chu pawh a rei berah thla khat te a nia, mahse "zin" ni lo hian "haw" hi a ni tlat tho. Mahni in awmna ni miau hek, chhungte leh thiante awmna ni bawk. Mahse a chang hi chuan "zin" pawh hi ti ila a inhmeh ve tho ang em aw? ka ti thin. Mikhual duk chang hi a awm fo. Khawpui a lo thang a, in thar leh dawr thar a lo tam a, bazar an lo siksawi a, bus fare a lo to a, Treasury Square te pawh a lo two-lane tawh bawk si (hahaha). Temple bula traffic point lah veilama i hel loh chuan fine a ni a, Zodin leh Chanmari ah chiah a in U-turn theih a, taxi fare a to uchuak bawk. Khawlaiah han chhuak ila hmelhriat hmuh tur reng an awm lo. Vengchhungah naupang te te an lo nula tlangval a, thianten pasal neiin hmun dangah an lo awm bo a, inah hian kawm tur nei lemlo in kan awm ruk ruk thin.

Mahse hrehawm ka ti lem lo. Thian han kawm dur dur chi hi ka ni lo a, ina awm mai mai hi nuam ka ti zawk fo. Unaute nen kan inkawm mai a, chhuah a ngaih leh min chhuahpui mai a. Tun tum ka haw phei chu ka pi kum 85 mi Champhai atangin a lo chhuk a, zing chaw ei khamah hian inchung ni lumah te kan mu vel thin. A mit zai turin a lo kal a, tarmit dum hi a bun raw zel a, "Man in black" kan ti a kan nuih vak vak zel, a ni pawh hrethiam lem hleilo in a nui liam ve mai mai.

Ka birthday March 4 kha Chapchar Kut a lo ni hlauh mai a, lammual grass phah lawm nan leh huau huau kal ve hrim hrim nan tiin kan va thawk chhuak ve a. Kan tleirawl lai a lammual khu lutuk tak kara hnam lam kan va tih ve thin te a ngaihawm rum rum duh nia. Vawikhat pawh inkawibah ah kan tel ve a, kan tumpui te kha an lo fet nasa, an pen hlawk bawk si. Kan han fet ve a, pen mai pawh duhtawk lo in a zuan ten kan zuang vel. Kan chak chuang lo.

Chapchar Kut denchhena a painting/photography exhibition leh flower show ah pawh ka va kal a, a nalh hlawm hle a, mahse chu aia hmuhnawm ka tih chu fire engine a chhak lawka lo ding kha a ni.

Ka thil hmuh khat deuh ka han hmuh chu zana arsi pe tuar kha a ni. A va han mawi tak em! En rei poh khan an tam poh emaw tih mai tur kha a ni lehnghal, kan mit kha a lo in adjust a arsi tereuhte te pawh kha kan hmuh belh tial tial ni in ka hre ber. Tlai ni tla tur pawh kha a mawi thei khawp mai. Reiek tlang chungah a sen rum a, bial lian deuh in, a hniam tial tial a, a tawpah chuan a pilbo a, mahse a chhehvel boruak chu a tisen phut reng tho a.

Sawi tur vak a awm lo. Kuhva ei hmel hmuh tur an tlem sawt in ka hria a, thil tha tak a ni, ha sen seng sung a hma ang em em kha chuan an tam tawhlo. Mahse meizial zu chu kan la tam. Amaherawhchu pawisa nawi a vang a ni! Ka va han vei em he thil hi chu, misual.com ah pawh ka post phah hial. In chhiar vek tawh maithei a, mahse lo la chhiar lo in awm palh tak hlauhin va chhiar teh un!