Khirh

Pathianin nungdama min la zuah zel te anih chuan engtik hunah emaw chuan kan lo tar ve ngei dawn sia, ka peihlo lawk! Ka peihloh nachhan ber chu thalai te nun ka man loh lutuk dawn vang pawh ni lo, kawm tur an awm dawn loh vang pawh nilo, ka khirh dawn lutuk ber hi! Tu leh fa te kan la nei ve ngai te a nih chuan min ning thei ngawt ang. "Ka pi hi chu phunchiar si, thil awmzia a hrethiam si lo,a ninawm ngawt mai" min la ti ang a, an nu te khan "In pi neihchhun a nih hi, duat rawh u" kha an lo ti bawk anga. Pasal te kan neih loh tak leh unaute bulah kan khawsa ang a, "In ni hi duat rawh u, duattu tur fa te a neih ve loh hi" an ti ang a.

Mahni kan inhriat ai daih leh kan rinai daih hian kan thlahtute hi kan lo chhun thin. Mizia ah te, chezia ah te, ngaihtuahna thleng te pawh a niang chu. Kan seilenna leh kan lehkhazirna, hnathawhna, chenna hmun te hian kawng tam zawkah chuan min influence mahse kan mizia tamtak hi chu kan thisen ah hian a bet hi ka ti ve tlat.

Ka nu te lam hi mi ngaihsam, thil pawh pawm zel thei mai an ni a. Ka pa te lam ve thung hi chu khirh ve angreng, phunchiar ve angreng, taima bawk si an ni a. A khawilam hi nge maw ka chhun le, ka ti thin. Ka ngaih kha chu a sam ve thei khawp mai, hoh pawh kha ho ve thei tak ka ni. Ka thiante leh min hre tute in zawh chuan mi ho ve angreng, thutak pai lemlo, thawveng ve tak ni thin in min sawi ang. Mahse chuti chung chuan khirhna lai te kha ka nei leh thin, ka ngei zawng leh ka ei loh deuh te kha chu polite taka han tuar hram hram mi kha ka ni ngai lo. A chang chuan tawngkam ngeiawm tak tak te pawh ka lo chhak chhuak thin.Thawveng bawk si, khirh bawk si ka ni thin anih ber chu.

Mahse kum te a han liam zel a, khirh lamah hian ka kal ta telh telh maiin ka inhria nih chu! A va han buaithlak em! Nula senior khirh an tih zawng zawng hi ka qualify zo dawn. Nula senior jokes hi kan sawi teh fo a, mahni thu a ar talh ngam ngat chuti khati kan ti a, a hmingin sum tlemte kan lo thawkchhuak ve a, nu leh pa ten min lo duat ve tho sia, ar pawh kha lo talh pawh ni ila enge maw in lo buai le? Mahniin torchlight (cell 3) pawh nei ila enge maw in nuihzat viau le? Tunge thimthamah indap du du peih? Sawi thui lo teh ang.

Tichuan, khirh lam kawng chu ka zawh chho zel chu a nia. Hmanlai anga thawveng taka awm kha chu la chak tho mahila a theih tawh loh. Nu leh pa te sum kha kan ring a, eng lem mah kha kan engto lo a, engpawh kha lo thleng se "A fel leh vek mai ang" kha kan ti liam puat thin a. Mahse tlema lo fin ve deuh tawh hi chuan a theih tawh miahloh. Hna han thawh ve tawh phei hi chuan kan uikawm em em a, kan sum neihzat hi kan hre kar mai a ni. I nuih hma khan han inngaihtuah chiang teh, nangpawh i sum neihzat chu i hre kar a ni lawm ni? Kha daih kha asin.

Khirh in a a ken tel tlat chu strict hi a ni. Strict hle mahila, sual nih chu ka duh lo ve fan tho. Mahse strict nge nge chuan mi kan lo hau zing deuh a, mi kan lo hauh zin deuh chuan min lo ning a, sual nih hi kan lo hlawh leh mai thin. A va buaithlak lehzel em! Thangthar zawk te hi ka rilru ang pu tur chuan ka beisei hauhlo, anmahni ang rual ka niha ka hoh zia leh thawven zia pawh ka hre vek, an rilru tur pawh ka hrethiam vek. Mahse ka lo hau leh thin tho.

Mahse fel thut emaw khirh loh thut emaw chu ka tum chuang lo. Khirh hmasa ber pawh ka ni lo a, khirh hnuhnung ber pawh ka ni dawn chuang lo, tih hi inhnemna nep tak ni mahse tun atan chuan lo inhnem ve der der nan hmang rih teh ang.